¡Xa arrincamos a Fase 2 do proceso participativo ‘Novo Sendeiro’!
O sábado 23 de setembro puidemos compartir cos veciños de Labañou unha mañá en Praza da Tolerancia, onde instalamos unha caseta informativa sobre o proxecto urbanístico do PEM18 Labañou e sobre o proceso participativo Novo Sendeiro.
Tamén estivemos o domingo 8 de outubro, coincidindo co marco do Mercado Ecolóxico da Coruña, na praza da Tolerancia.
Alí estivemos a informar aos veciños da evolución que viviu o proxecto, adaptándose ás diversas suxestións recollidas ao longo do tempo.
Tras a primeira fase de consulta e diálogo coa cidadanía, incorporamos variacións ao proxecto para unha maior integración na contorna: destaca a homoxeneización de alturas e o soterramento do tráfico rodado, dando protagonismo claro á peonalización e á bicicleta en superficie. Un deseño que coidará ao máximo os corredores visuais para garantir a conexión deste desenvolvemento urbanístico co mar.
Dando resposta ás demandas cidadás, tamén se adaptará a zona verde para que sirva de punto de encontro da comunidade local, sexa heteroxénea, accesible e conte con identidade propia. Unha área na que se priorizará a utilización de flora e fauna autóctona para fomentar a biodiversidade e os espazos naturais.
Continuamos co proceso de escoita para seguir identificando novas oportunidades para o barrio e as mellores alternativas para dar resposta ás necesidades da cidadanía.
Agradecemos a todas as persoas que participaron coas súas suxestións e achegas de mellora do proxecto.
