Abrimos espazo de información permanente! Desde mediados de abril esta nova infraestrutura do proxecto ‘Novo Sendeiro’ busca o fomento activo, libre e aberto da discusión sobre cidade desde a cidade, para continuar involucrando á cidadanía e entidades locais na futura transformación do barrio de Labañou.
Contouse coa colaboración de alumnado da Escola de Deseño Industrial do campus de Ferrol da Universidade da Coruña (UDC), para o deseño e construción do mobiliario e equipamento móbil, que se utilizará nos próximos encontros e accións participativas.
Avánzase así nos preparativos para iniciar o co-deseño de aspectos concretos do Plan Especial Labañou, como o gran espazo público que se prevé, as súas estratexias ambientais, a elaboración dun plan de baixos comerciais e as oportunidades que se poden abrir co resto do barrio e a cidade. En abril e maio prevense tres talleres de co-creación con entidades locais e dúas sesións de debate entre cidadáns e expertos.
Fotografía: Alberte Peiteavel
