O 18 de maio de 2023 tivo lugar o segundo Parlamento Urbano co que se pechou a Fase 1 de ‘Aprendizaxe e Creación’ do proceso de participación cidadá ‘Novo Sendeiro’. Nesta ocasión, tratouse especificamente un asunto recorrente que viñemos detectando desde o principio do proceso e é a pobre calidade do espazo público que percibe a cidadanía coruñesa nos seus barrios. Para o desenvolvemento da sesión contouse de novo coa presenza do relator gráfico David Cárdenas que foi ilustrando a man e en tempo real toda a sesión nun mural que fará as veces de acta resumen.
A dinámica do encontro consistiu en primeiro lugar en expoñer a percepción que os asistentes tiñan sobre o valor que os terreos de Labañou como espazo público actualmente. Algúns valoraban en positivo a súa natureza auténtica e “salvaxe” como o último reduto na cidade sen intervención humana, outros non apreciaban que o seu estado actual fose útil como verdadeiro lugar de esparexemento, ademais destacaron a presenza de animais non desexados e o seu único uso real como aparcamento “alegal” e de paseo de cans. Tras este primeiro momento de debate quixemos que os asistentes lembrarán exemplos doutros espazos públicos da cidade que lles inspirasen, en positivo ou en negativo, e dos que poder aprender para chegar a un último punto do debate onde puidésemos, entre todos os asistentes, redactar unha sorte de “decálogo” de valores que debe reunir un espazo público para ser considerado de calidade.
A sesión pechouse cunha exposición resumen por parte de Zuloark das Fase 1 para veciños, representantes de asociacións, expertos, estudantes, promotores e equipo redactor presentes, agradecendo ademais a súa asistencia aos distintos encontros celebrados. Todo este proceso, que se constrúe lentamente e desde abaixo, axúdanos a avanzar cara a un Plan Especial Labañou que mellore ao capitalizar os ensinos e achegas de cada participante desde as súas diversas posicións e realidades.
En breve continuaremos coa Fase 2 do proceso participativo ‘Novo Sendeiro’!
