O 4 de maio de 2023, desenvolveuse a segunda parte do Taller de Co-creación sobre “Asesorías en accesibilidade” con ASPRONAGA (Asociación de Personas con Discapacidad Intelectual de Galicia).
Nesta segunda parte, recolléronse as propostas escritas e gráficas dos estudantes, en relación coas impresións e inquietudes que xurdiron do primeiro paseo polo ámbito. Á súa vez, abríronse a debate tres temas de conversación: Que lle falta a Labañou?; Que protexer de Labañou?; e Que eliminar de Labañou?
Xurdiron así, propostas e oportunidades en relación con: o uso do espazo público, a configuración das áreas verdes e espazos de recreación, a protección e revalorización de monumentos, a accesibilidade segura nos cruces peonís, a importancia das cores e das visuais ao mar.
Iníciase así unha colaboración directa e real, neste caso con ASPRONAGA pero aberto a novas entidades, coa determinación de profundar na capacidade de cambio sobre as decisións que se toman nas nosas cidades de colectivos que normalmente non se teñen en conta máis que a través de normativas ou manuais interpostos.
Fotografía: Alberte Peiteavel